2017-05-16 聖雅各推「盛饌」8款 口感如慕絲 吞嚥難長者可享家居軟餐
【明報專訊】有吞食困難或者體弱嘅長者成日都要食無味糊仔，好難有胃口，聖雅各福群會推出首個家居軟餐「盛饌」，除咗取其諧音「盛讚」之意，亦係專為有吞食困難同體弱長者而設，口感好似moouse（慕絲），質感軟滑，幾年前已經喺多間安老院舍做試行計劃，發現會令長者食快啲、食多啲。
每款$22或$27 要解凍8個鐘
「盛饌」共有8款，包括甘筍、紹菜、白菜、豆腐、雞肉、豬肉、魚柳同牛肉，每款22蚊或者27蚊，一菜一肉嘅配搭就賣40蚊，解凍8個鐘，再蒸大約25分鐘就食得。
一菜一肉加碗粥 夠一餐營養
聖雅各福群會話，醫管局有統計報告顯示，中風同認知障礙症係令老人家吞食困難嘅兩大主因，繼而令老人家無胃口同營養唔好，影響健康。該會嘅營養師關建慧同Emily講，呢類老人家一般食碎餐或者糊餐，但呢類餐嘅賣相唔討好，令老人家唔想食，「盛饌」一菜一肉配搭夾埋有200克，再配一碗粥或糊飯，就夠老人家一餐所需營養。
該會持續照顧服務高級經理蔡嘉儀話，老人家食唔到正常餐往往令屋企人好頭痕，希望「盛饌」減少照顧者準備嘢食同餵餐時間，令佢哋同老人家嘅相處更好。
聖雅各福群會話，市民可以即日起打2831 3237或者上網訂購，3個工作天左右就會收到回覆，可以揀去灣仔、上環、石硤尾或者荃灣嘅聖雅各福群會辦事處攞貨。
來源: 【明報專訊】http://jump.mingpao.com/resources/detail/s00012/1494901382563
