2017-09-18 煤氣公司首推水蒸熱食「暖心月餅」　適合吞嚥困難患者食用

早前有網上熱話指有僱主對外傭以蒸嘅方法處理冰皮月餅，令佢哭笑不得。呢次煤氣公司首推嘅暖心月餅，真係建議以中小火隔水蒸20分鐘再食，唔係搞笑架，係煤氣公司為一啲吞嚥困難患者而設嘅熱食月餅，希望佢地都可以同常人分享中秋美食嘅樂趣。

煤氣公司同聖雅各福群會合作研發全慕斯月餅，4款口味包括紫薯紅豆、綠茶紅豆、朱古力奶皇及甘薯奶皇。因為暖心月餅以中小火隔水蒸20分鐘後會變得軟滑，唔駛大力咀嚼，適合吞嚥困難患者。

傳統月餅蓮蓉黏膩，好容易黏喺吞嚥困難患者喉嚨以致嗆喉甚至窒息，而蛋黃亦係較難消化嘅食物，因此一般不建議佢地食用傳統月餅。煤氣公司暖心月餅即日起於煤氣公司旗下嘅尖沙咀名氣廊 (Flame at Towngas Avenue) 及聖雅各福群會6個分銷點發售。